عبارة عن عجينة كيك سهلة اسفنجية
وسوتها فى قوالب صغيرة بتاعة الكاب كيك او الجيلى
سريعة التحضير وبتكون هشة وطعمها جميل جدا
وممكن تتقدم مع الشاى وممكن لوحده خالص
المقادير
* 5 بيضات
* 1 كوب سكر ناعم (250 جرام)
* كوب ونص دقيق (200 جرام)
* 50 جرام توت
* 125 جرام كاكاو
* معلقة زبدة
* معلقة بيكنج باودر
* معلقة فانيليا
الطريقة
نضرب البيض مع الفانيليا بالمضرب لحد ما البيض يبقى زى الرغوة
وبعدين نضيف السكر شوية شوية واحنا بنقلب ونفضل نضرب لحد ما يبقى شبه الكريمة
واحنا بنضرب البيض لو بمضرب سلك عادى يبقى فى اتجاه واحد عشان الهوا
نضيف الدقيق بالبيكينج باودر شوية شوية ونقلب بس مش بالمضرب
نجيب القوالب وندهنها بزيت ونرش عليها دقيق ونخبط فى القالب لحد ما يتغطى كله دقيق ونفضى الزيادة
دا بيخلى العجينة متلزقش فتطلع الكيكة بسهولة
نصب الكيك فى القوالب هحتاج حوالى 10 وحدات
واجيب التوت احطه فى دقيق وانفضه وبعدين احطه فى القوالب
والدقيق دا ميخليهوش يهبط لقاع القالب ويتحرق
بالنسبة للكاكاو بقى ببعمل نص الكمية كاكاو يعنى بحطه فى العجينة واقلب بالراحة فى نفس الاتجاه برضه
ونصبها عادى ومش شرط يبقى قوالب سادة وقوالب شيكولاتة
ممكن مملاش القالب كله واحط شوية سادة فوقهم فى النص كمية باللى بكاكاو لما بتتقطع بيبقى شكلها حلو قوى
مبنملاش القالب على الاخر
بنملى تلتين بس عشان الكيك هيزيد
نسخن الفرن كويس جدا قبل ما ندخل الكيك
ونحط الكيك 10 دقايق نار عالية و10 متوسطة
ومنفتحش الفرن خالص الا لما تفوت المدة والا هيهبط لكيك
ومنطلعوش اول ما نطفى نسيبه يبرد مع الفرن شوية وبعدين نطلعه من الفرن ومن القوالب بعد كدا
لو عاوزين نحط شيكولاتة او كاكاو ندوبه فى زبدة على بخار مية ونرشه على الوش
وبالهنا والشفا
